კასუმლოს ახალგაზრდული ცენტრი
მარნეულის მუნიციპალიტეტის სოფელ კასუმლოში რამდენიმე წელია სათემო ცენტრი ფუნქციონირებს. ეს ის სივრცეა, სადაც ახალგაზრდები ხშირად იკრიბებიან და სხვადასხვა საკითხებზე ერთად მუშაობენ.
„კასუმლოს ახალგაზრდული ცენტრი“-ს ისტორია 2017 წელს დაიწყო.
მეათეკლასელი გოგო გადაწყვეტს ქართული ენა კარგად შეისწავლოს. ამას, როგორც ახლა უკვე თავად გვიყვება „სკოლის დირექტორის დახმარებით“ შეძლებს. დაესწრება ტრენინგებს – ისწავლის პროექტების წერას. შემდეგ კი პროექტს თავად დაწერს და განახორციელებს. საუბარია არზუ ბაირამოვაზე. არზუ დღეს უკვე ამბობს, რომ „ბავშვობის ოცნება რეალობად აქცია“.
გვიყვება, რომ პირველი გამოწვევა იყო ახლადშექმნილი ცენტრისთვის ფართის გამოძებნა. თავდაპირველად, სოფლის ყოფილი ამბულატორიის შენობაში შევიდნენ. დღეს კი ოფისი არზუ ბაიარმოვას ოჯახის ავტოფარეხშია მოწყობილი.
დღეს ცენტრში ადგილობრივებს შეუძლიათ ინგლისური და ქართული ენის უფასო კურსების გავლა. არზუ ამბობს, რომ კურსებზე ასაკოვანი ადამიანებიც დადიან.
„კასუმლოს ახალგაზრდული ცენტრი“-ს გააქტიურების პარალელურად გაიზარდა მისი წევრების რაოდენობაც. 17 -ის ნაცვლად მათ ახლა 265 მოხალისე ჰყავთ. არზუ ბაირამოვა წარმატებით განხორციელებულ პროექტებზე საუბრობს და რამდენიმე მათგანს გამოარჩევს.
„მწვანე ახალგაზრდები“ ამ პროექტის ფარგლებში „შაბათობა“ რამდენჯერმე მოეწყო. მოსწავლეებმა, ახალგაზრდებმა, ადგილობრივებმა სოფელი დაასუფთავეს – დარგეს ხეები.
საქართველოს გაეროს ასოციაცია-მ კასუმლოს ახალგაზრდულ ცენტრთან თანამშრომლობით, მოძრავი სახალხო უნივერსიტეტის ლექციები გამართა სხვადასხვა აქტუალურ თემებზე.
ცენტრში „აზერბაიჯანის რესპუბლიკის დიასპორასთან მუშაობის სახელმწიფო კომიტეტთან“ ერთად განხორციელებული პროექტის ფარგლებში ქართულის, ინგლისურის და ჟურნალისტიკის უფასო კურსები ჩატარდა. ახალგაზრდებისა და ასაკოვანი მოსახლეობისთვის კვირაში სამჯერ გაკვეთილები ტარდებოდა.
არზუ ბაირამოვა ამბობს, რომ ამასთან ერთად მათ, ქალთა უფლებებზე 4 პროექტი განახორციელეს. გოგონებმა და მათმა მშობლებმა მიიღეს მონაწილეობა.
დაორგანიზდა ექიმთან შეხვედრა, ასევე, თბილისში უმაღლეს და პროფესიულ სასწავლებლებში ვიზიტი.
არზუ ბაირამოვა ამბობს, რომ აქტიურად თანამშრომლობს „ახალი აზროვნების ინსტიტუტთან“ და „კავკასიურ სახლთან“. სპიკერების მოწვევა სხვადასხვა აქტუალურ თემებზე სასაუბროდ მათი საქმიანობის ნაწილია. ასევე, გვიყვებიან წიგნის კითხვის კლუბის შექმნაზეც. თბილისიდან ჩამოსული სტუდენტები მოსწავლეებს, თანატოლებს წიგნებს ჩუქნიან. ერთად კითხულობენ და შემდეგ პრეზენტაციებს ამზადებენ.
ცენტრის ხელმძღვანელი არზუ ბაირამოვა ასევე აღნიშნავს, რომ პანდემიის დროსაც მოსახლეობის გვერდით იდგნენ. „პანდემიის დროს უფრო მეტი პროექტი განვახორციელეთ, ვიდრე პანდემიამდე“- ამბობს არზუ ბაირამოვა.
ცენტრი სამომავლოდ ახალი პროექტის განხორციელებას გეგმავს. მთავარი მიზანი -მოსწავლეების, ახალგაზრდების, თემის წარმომადგენლების დახმარება და განვითარებაა, სხვადასხვა მიმართულებით.
„ განვითარდეთ და განვავითაროთ – ესაა ჩვენი ცენტრის მესიჯი ახალგაზრდებს. ჩვენი ცენტრის მიზანია ახალგაზრდების განვითარება და სოფლის ასაკოვანი მოსახლეობის დახმარება სხვადასხვა საკითხებში“- საუბრობს „კასუმლოს ახალგაზრდული ცენტრი“-ს დირექტორი.
„კასუმლოს ახალგაზრდული ცენტრი“- ს საქმიანობის ეფექტურობაზე, მის წევრების შეფასებებსაც ვისმენთ.
„ ცენტრის მუშაობამ ხელი შეგვიწყო ძალიან ბევრ რამეში. შეიცვალა ჩვენი ცხოვრება უკეთესობისკენ. ჩვენში გაიზარდა ინტერესი არაფორმალური განათლებისადმი. ეს სამომავლო ცხოვრებაში აუცილებლად გამოგვადგება“- გიუნელ გიულმამედოვა.
ავტორი: გურანდა ფუტკარაია
აზერბაიჯანული თარგმანი: ჩიჩაკ გუსეინოვა
ინგლისური თარგმანი: თამარ ჩერქეზიშვილი
სტატია შექმნილია სამოქალაქო საზოგადოების ინსტიტუტის მხარდაჭერით, ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის” ფარგლებში. მის შინაარსზე სრულად პასუხისმგებელია ქვემო ქართლის მედია და შესაძლოა, რომ იგი არ გამოხატავდეს ევროკავშირისა და კონრად ადენაუერის ფონდის შეხედულებებს.
პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად – საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP).
QvemoQartli.ge
მასალის გამოყენება შეგიძლიათ, მხოლოდ, საიტის მითითებით.